Cilat janë disa nga detyrimet e tregtarëve për ofrimin e mallrave dhe shërbimeve?

• Te japin të dhëna të plota dhe të sakta për mallrat dhe shërbimet e vendosura në treg ose të parashikuara për t’u vendosur në treg.
• Të vendosin në treg vetëm mallra të sigurta, të cilat plotësojnë kërkesat e përcaktuara nga legjislacioni në fuqi për mallrat ushqimore dhe joushqimore. I njëjti detyrim ekziston edhe për ofrimin e shërbimeve.
• Çmimi i shitjes së mallrave ose shërbimeve të ofruara duhet të jetë i qartë, lehtësisht i dallueshëm dhe i lexueshëm. Ai duhet të shprehet vetëm në lekë.
• Në mallrat për shitje, duhet të jenë të shënuara në gjuhën shqipe, dukshëm dhe kuptueshëm: emërtimi i mallit, adresa e fabrikuesit dhe/ose importuesit, marka ose çdo shenjë tjetër dalluese e fabrikuesit, importuesit ose furnizuesit, pesha, sasia, përmasat ose dimensionet, jetëgjatësia minimale ose data e skadimit, nëse ka, si dhe çdo informacion tjetër që, në vartësi të natyrës së mallit, është i domosdoshëm për identifikimin ose përdorimin e tij.
• T’i japin konsumatorit kupon tatimor ose faturë tatimore për mallin e shitur ose shërbimin e ofruar, të cilin/ën ai është i detyruar ta marrë.
• T’i shesin mallrat të ambalazhuar ose të paketuar në mënyrë të rregullt e të sigurt.
• Të gjitha të dhënat dhe informacionet më të domosdoshme për mallrat dhe shërbimet duhet të jenë në gjuhën shqipe.
• Janë të detyruar të vendosin në njësinë e tyre të tregtimit emërtimin tregtar, adresën, orarin e shërbimit ndaj konsumatorit, si dhe të dhëna të tjera, që lidhen me natyrën e mallrave ose të shërbimeve që ofrojnë.