Çfarë duhet të mbahet parasysh gjatë procesit të menaxhimit të mbetjeve?

Mbetjet menaxhohen duke mos vënë në rrezik shëndetin e njeriut, duke mos përdorur procese ose metoda që mund ta dëmtojnë atë ose mjedisin, dhe sidomos:

• duke mos vënë në rrezik ujërat, ajrin, tokën, tokën bujqësore, bimët ose kafshët;
• duke mos ndikuar negativisht mbi fshatin ose vendet me interes të veçantë;
• duke mos shkaktuar shqetësime përmes zhurmave ose aromave në mjediset përreth.

Cilat janë veprime të ndaluara për sa i përket menaxhimit të mbetjeve?

Ndalohen:

• hedhja apo groposja e të gjitha llojeve të mbetjeve në vende publike;
• hedhja apo groposja e të gjitha llojeve të mbetjeve në parcelat bujqësore të mbjella ose jo, në anë të kanaleve kulluese e ujitëse, si dhe në çdo vend tjetër ku dëmtohen toka, bima dhe kafsha;
• hedhja apo groposja e të gjitha llojeve të mbetjeve në toka bujqësore;
• djegia e të gjitha llojeve të mbetjeve në kundërshtim me ligjin;
• braktisja, depozitimi apo asgjësimi i pakontrolluar i mbetjeve.

Për moszbatimin e këtyre ndalimeve, personat përgjegjës dënohen me gjobë.